Ba’zi buzg‘unchi va mutaassib oqimlar tinchlik qaror topgan, azoni aytilayotgan, masjidlari obod, musulmonlar emin-erkin ibodatini bajarib yurgan diyorlarni "Darul-kufr" (kufr diyori) deb e’lon qilishadi. Bu mutlaqo ilmsizlik va shar'iy qoidalarni buzishdir.

Fiqh ulamolari, xususan Hanafiy mazhabining mo‘tabar manbalarida (masalan, Imom al-Kāsāniyning "Badā'i' as-Sanā'i'" va boshqa fiqhiy asarlarda) ta'kidlanishicha:

Darul-Islom (Islom diyori) — bu musulmonlar xavfsiz va emin-erkin ibodatlarini bajaradigan, azon aytiladigan va juma hamda hayit namozlari ado etiladigan diyorlardir.

Bir yurtda musulmonlar xavfsizlikda yashab, ibodatlarini (namoz, ro‘za, zakot, haj) erkin ado etayotgan bo‘lsalar, u yurt Darul-Islom sanaladi.

Alloh taolo Qur'oni karimda tinch va xavfsiz yurtlarni, Uning ne'matlariga shukrona keltirgan holda yashashni madh etadi:

وَضَرَبَ اللَّهُ مَثَلًا قَرْيَةً كَانَتْ آمِنَةً مُّطْمَئِنَّةً يَأْتِيهَا رِزْقُهَا رَغَدًا مِّن كُلِّ مَكَانٍ فَكَفَرَتْ بِأَنْعُمِ اللَّهِ فَأَذَاقَهَا اللَّهُ لِبَاسَ الْجُوعِ وَالْخَوْفِ بِمَا كَانُوا يَصْنَعُونَ

(سُورَةُ النَّحْلِ: 112)

"Alloh bir shaharni (yoki qishloqni) misol keltirur: u tinch, osoyishta edi, riziq-ro‘zi har tomondan mo‘l-ko‘l kelib turardi. So‘ngra u (aholisi) Allohning ne’matlariga noshukrlik qildi. Shunda Alloh qilgan qilmishlari sababli unga ochlik va xavf-xatar libosini totdirib qo‘ydi."

(Nahl surasi, 112-oyat)

Yurtimizda minglab masjidlar, madrasalar, Islom sivilizatsiyasi markazlari ishlab turibdi. Odamlarimiz ibodatlarini xavfsizlikda ado etmoqdalar. Shunday sharoitda ushbu yurtni inkor etish, ne’matga noshukrlik qilish va undan "qochish" shar’an joiz emas.

Fitnalardan ogoh bo'lish va Vatan tinchligini asrash
Bugungi kunda "hijrat" nomi ostida yoshlarni aldab, g'arbiy va sharqiy Osiyodagi yoki Yaqin Sharqdagi urush maydonlariga chorlayotganlar aslida Islom dushmanlarining siyosiy o‘yinlariga xizmat qilmoqdalar.

Payg‘ambarimiz sollallohu alayhi vasallam kelajakda sodir bo‘ladigan fitnalardan ogohlantirib, shunday degan edilar:

:قَالَ رَسُولُاللهِ صَلَّى اللهُ عَلَيْهِ وَسَلَّمَ:عَنْ أَبِي هُرَيْرَةَ رَضِيَ اللهُعَنْهُ قَالَ
"سَتَكُونُفِتَنٌ الْقَاعِدُ فِيهَا خَيْرٌ مِنَ الْقَائِمِ،وَالْقَائِمُ فِيهَا خَيْرٌ مِنَ الْمَاشِي، وَالْمَاشِيفِيهَا خَيْرٌ مِنَ السَّاعِي، وَمَنْ يُشْرِفْلَهَا تَسْتَشْرِفْهُ، وَمَنْ وَجَدَ مَلْجَأًأَوْ مَعَاذًا فَلْيَعُوذْ بِهِ

 (رَوَاهُ الْبُخَارِيُّوَمُسْلِمٌ)

Abu Hurayra roziyallohu anhudan rivoyat qilinadi:

Rasululloh sollallohu alayhi vasallam aytdilar:

"Tez orada fitnalar bo‘ladi. Unda o‘tirgan kishi tik turgandan ko‘ra yaxshidir. Tik turgan kishi yurib ketayotgandan ko‘ra yaxshidir. Yurib ketayotgan kishi (fitna tomonga) shoshilayotgandan ko‘ra yaxshidir. Kim fitnaga intilsa, fitna uni o‘ziga tortib halok qiladi. Kimki bir boshpana yoki panoh topa olsa, u bilan saqlansin!"

(Imom Buxoriy va Imom Muslim rivoyati)

Bugungi fitnalardan saqlanishning yagona yo‘li — soxta internet chaqiriqlariga aldanmaslik, diniy ilmni faqat va faqat rasmiy, mo‘tabar va ilmli ulamolardan olish, ota-ona xizmatida bo‘lish va Vatanimiz tinchligini asrashdir.

Islom dini tinchlik, bunyodkorlik va ma’rifat dinidir. Dinimiz hech qachon tinch va osoyishta yurtni tashlab, buzg‘unchilik va qon to‘kilayotgan joylarga borishni hijrat deb baholamaydi.

Haqiqiy muhojir — qalbini va amallarini gunohlardan poklagan, ota-onasi va jamiyatiga manfaat keltirgan insondir.

Karmana tumani “Jaloyir” 

jome masjidi imom-xatibi                                          A.Hakimov